აჭარის სანაპირო, თავისი სუბტროპიკული კლიმატით და 21 კილომეტრიანი სანაპირო ზოლით, გთავაზობთ გართობისა და დასვენების განსაკუთრებულ გამოცდილებას. შავი ზღვის წყლის ტემპერატურა 21-დან 29°C-მდეა. ბათუმი, როგორც კურორტი, მზის თერაპიასა და ზღვის აბაზანებით მკურნალობასაც გთავაზობთ. ქალაქი გაჯერებულია ზღვის, აკაციისა და მაგნოლიების სურნელით და აქ წელიწადის ყველაზე ცივ თვესაც კი – იანვარში, ჰაერის ტემპარატურა +7-10 გრადუსია. ასე, რომ შეგიძლიათ ბათუმს წელიწადის ნებისმიერ დროს ესტუმროთ.

სამთო-სათხილამურო სპორტის მოყვარულებს აჭარა დიდ არჩევანს სთავაზობს. მთების საშუალო სიმაღლე აქ 2000-2500 მეტრია, ჰავა ნოტიო, ზამთარი – შედარებით ცივი და ხანგრძლივი, ხოლო ზაფხული – ხანმოკლე და გრილი.
მაღალმთიან აჭარაში აქტიურად ვითარდება სამთო-სათხილამურო კურორტები,რომელთაც, სპორტულის გარდა, სამკურნალო-რეკრეაციული დანიშნულება აქვთ და წლის ოთხივე სეზონისთვისაა გათვალისწინებული.

ფრინველებსა და მცენარეებზე დაკვირვება, ქვიშის დიუნები, სფაგნუმიანი ჭაობები, ზიპლაინი, ულამაზეს ტბებზე ლაშქრობა, კულტურული ძეგლების, ტაძრებისა და თაღოვანი ხიდების დათვალიერება, ფეხით და ცხენით აჭარის საოცარ სოფლებში გასეირნება – ეს არასრული ჩამონათვალია იმ ეკოტურისტული აქტივობებისა, რომლითაც აჭარის დაცულ ტერიტორიებზე შეიძლება გაერთოთ. ქობულეთის, კინტრიშის, მტირალასა და მაჭახელას დაცული ტერიტორიები, ბათუმის ბოტანიკური ბაღი, მწვანე ტბა, გოდერძის ტყე და კიდევ ბევრი ულამაზესი ადგილი-თქვენთვის, უდაოდ, აღმოჩენად იქცევა.

აჭარაში გამართული მრავალი მნიშვნელოვანი ღონისძიების წყალობით, აჭარამ MICE ტურიზმის საერთაშორისო ბაზარზე წამყვანი პოზიცია მოიპოვა. ბიზნეს შეხვედრების, კონფერენციებისა და გამოფენების მასპინძლობისთვის აჭარა ქვეყნის ერთერთი გამორჩეული რეგიონია. თანამედროვე ტექნოლოგიებით აღჭურვილი ინფრასტრუქტურა, უგემრიელესი ადგილობრივი, ევროპული თუ აზიური სამზარეულო, მსოფლიო დონის მომსახურება, მომხიბვლელი გარემო – ის პირობებია,

საქართველოში მეღვინეობა-მევენახეობის ტრადიციები 8000 წლის წინათ იღებს სათავეს. UNESCO–ს მიერ ქართული ქვევრის ღვინის დაყენების ტრადიცია აღიარებულ იქნა მსოფლიოს არამატერიალური კულტურული მემკვიდრეობის ძეგლად. დასავლეთ საქართველოს რეგიონებიდან მეღვინეობის ერთ-ერთ უძველეს კერას სწორედ აჭარა წარმოადგენს. აჭარის მასშტაბით მევენახეობა განსაკუთრებით განვითარებულია ქედის მუნიციპალიტეტში. აჭარაში წარმოებული ღვინის უნიკალური სახეობებია "ქედის ცოლიკაური" და "ჩხავერი".

სათამაშო ბიზნესი ბათუმში დიდი პოპულარობით სარგებლობს და აზარტის მოყვარულებს კაზინოების ფართო არჩევანს სთავაზობს. საქართველოს კანონმდებლობით სათამაშო ბიზნესის წარმოება ნებადართულია. ამჟამად, ბათუმში არსებული კაზინოების უმრავლესობა განლაგებულია 5 ვარსკვლავიანი სასტუმროების შენობებში. საერთაშორისო სტანდარტების სასტუმროების მიმდინარე მშენებლობები უახლოეს წლებში კაზინოს ბიზნესის კიდევ უფრო განვითარებას შეუწყობს ხელს.